Қазақстан Көлік министрлігі әуе көлігімен жолаушыларды, багаж бен жүкті тасымалдау ережелеріне өзгерістер енгізу жобасын әзірледі, деп хабарлайды infohub.kz сайты.
Жаңа ережелердің қатарында — музыкалық аспаптарды тасымалдауды реттеу. Жолаушылар аспаптарды қол жүгі ретінде салонға ала кіре алады, бөлек орынға орналастыра алады немесе талаптар сақталған жағдайда багажға тапсыра алады. Салонда домбыра мен қобызды қорғаныс футлярында алып жүру мүмкіндігі бөлек бекітілген. Аспаптың орамасымен өлшемі 110×35×30 см-ден, салмағы 10 кг-нан аспауы тиіс.
Сондай-ақ әуе компанияларының шарттары сақталған жағдайда үй жануарларын салонда тасымалдау мүмкіндігін бекіту жоспарлануда.
Жоба мүгедек жолаушыларға жеңілдіктерді заңнамалық тұрғыдан бекітуді көздейді және ұшақты аз сыйымдылықты әуе кемесіне мәжбүрлі ауыстыру кезінде орналастыру тәртібін анықтайды. Тасымалдауда басым құқықты әлеуметтік осал топтар алады: кәмелетке толмағандар, мүгедектер, ауыр науқастар, жүкті әйелдер мен зейнеткерлер.
Жеке түзетулер әуе компанияларының жауапкершілігін күшейтеді: жолаушыны жеткізу кешіктірілгені үшін айыппұлды өтініш берілген күннен бастап 10 күнтізбелік күннен аспайтын мерзімде төлеу мерзімін белгілеу ұсынылады. Сондай-ақ тасымалдаушылардың кінәсі дәлелденген жағдайда тіркелмеген багаждың бүлінуі үшін жауапкершілігі болуы мүмкін.
Жоба «Ашық НҚА» порталында жария талқылауға шығарылды. Мүдделі азаматтар мен ұйымдар ұсыныстары мен ескертулерін жолдай алады.