Көстанайда жаяу жүргіншілер өткелінде ерлі-зайыптыларды қағып кеткен жүргізушіге үкім шығарылды. Әйел алған жарақаттардан қайтыс болды, ал ер адам тірі қалды. Айыпталушы нақты мерзімге бас бостандығынан айырылып, бес жылға жүргізуші куәлігінен айырылды. Бұл туралы infohub.kz хабарлайды.
Көстанай облысы соттарының ресми Telegram-арнасында хабарлағандай, қылмыстық іс Көстанай №2 сотында қаралды. Жүргізуші жол жүрісі ережелерін бұзып, абайсызда адам өліміне әкеп соқтырды деп айыпталды (Қазақстан Республикасы Қылмыстық кодексінің 345-бабы 3-бөлігі).
Сот анықтағандай, 2025 жылғы қыркүйекте айыпталушы Қайырбеков көшесімен келе жатып, 1967 және 1963 жылы туған жаяу жүргіншілерді қағып кеткен. Олар бағдаршамсыз жаяу жүргіншілер өткелінен жолды кесіп өтіп жатқан. Салдарынан ерлі-зайыптылар әртүрлі дәрежедегі жарақаттар алған, кейін әйел қалалық ауруханада қайтыс болған.
Айыпталушы кінәсін толық мойындап, соттан қоғамнан оқшаулауға байланысты емес жаза тағайындауды сұрады. Жәбірленушілер шешімді соттың қарауына қалдырды. Үкім шығару кезінде сот жеңілдететін мән-жайларды ескерді: жәбірленушілерге материалдық және моральдық залалды толық өтеу, шын жүректен өкіну және кінәні толық мойындау. Ауырлататын мән-жайлар анықталмады.
Айыпталушының жеке басын, жәбірленушілердің пікірін және істің барлық мән-жайларын ескере отырып, сот екі жылға бас бостандығынан айыру жазасын тағайындады. Жаза ең төменгі қауіпсіздіктегі қылмыстық-атқару жүйесі мекемесінде өтеледі. Сонымен қатар, жүргізуші бес жыл мерзімге көлік жүргізу құқығынан айырылды. Үкім заңды күшіне енген жоқ.