2026 жылдың қазанынан бастап Қазақстанда «Әлеуметтік төлемдерден өз еркімен бас тарту» цифрлық сервисі жұмыс істеп келеді. Осы уақыт ішінде оны өзін және отбасын өз бетінше асырауға мүмкіндігі бар 729 азамат пайдаланды, деп хабарлайды infohub.kz сайты.
Қазақстан Республикасы Еңбек және халықты әлеуметтік қорғау министрлігінің түсіндіруінше, қызмет іске қосылғаннан бері 729 адам алып жүрген әлеуметтік төлемдерінен өз еркімен бас тартуға шешім қабылдаған.
«729 адам алып жүрген әлеуметтік төлемдерінен өз еркімен бас тартуға шешім қабылдады. Бұл қадам әлеуметтік жауапкершілік пен қоғамдық ынтымақ қағидаттарын көрсетеді: өзін және отбасын өз бетінше асырауға мүмкіндігі бар азаматтар мемлекеттік қолдаудан саналы түрде бас тартады», – деп қорытындылады ведомство.
Мемлекеттік қолдау жүйесіндегі өзгерістер 2027 жылдан бастап күшіне енеді: жекелеген жәрдемақы түрлері отбасының әлеуметтік әл-ауқат деңгейін бағалау негізінде қажеттілік қағидаты бойынша берілетін болады. Еңбек министрлігінің нақтылауынша, 2027 жылғы 1 қаңтардан бастап өзгерістер 36 әлеуметтік жәрдемақы түрінің 12-сіне қатысты болады – олар атаулы түрде және шынымен қажет ететін адамдарға ғана тағайындалады.
Сонымен қатар қазақстандықтар жаңа сервисті пайдалануға және өздеріне тағайындалған жәрдемақылардан бас тартуға міндетті емес – бұл азаматтың тек өз еркімен қабылдайтын шешімі. Төлемдерден бас тарту оларды болашақта алу мүмкіндігінен айырмайды: өмірлік жағдай өзгерсе, азамат тиісті көмекті тағайындауға қайта жүгіне алады, ал өтініш заңнамаға сәйкес жалпы негізде қаралады.
Сервисті eGov Mobile қосымшасында және Электрондық үкімет порталында пайдалануға болады. Бұл мүмкіндік тек әлеуметтік төлемдер мен жәрдемақы алушыларға қолжетімді – мемлекеттік қолдау алып жүрмеген азаматтар бұл сервиске кіре алмайды.
Бұған дейін қазақстандықтардың қайсысы А (әл-ауқат деңгейі жоғары), B (ауқатты), C (табысы 305 мыңнан жоғары), D (кедейлік шегінде) және Е (ең осал санат) санаттарына жатқызылатыны хабарланған болатын.