Димаш Құдайбергеннің жанкүйерлері оның DIMENSIONS әлемдік турына қызу дайындалып, ақпараттық және шығармашылық шаралар өткізуде. Олар қазақстандық әншінің өнерін жерлестеріне таныстыруды мақсат еткен, деп хабарлайды infohub.kz сайты.
DIMENSIONS турының басталуына бір айдан сәл астам уақыт қалды, алайда жанкүйерлер сүйікті әншісін зор қуанышпен қарсы алуға әзір. Қазақстандық әртіс 18 қазанда Краковте алғашқы концертін береді. Концерт қарсаңында поляк жанкүйерлері екі күндік акция өткізді. «Ашық Краков» бағдарламасының 10 жылдығына арналған пикникте олар қала тұрғындарын Қазақстанмен, Димашпен және оның өнерімен таныстырды. Ал екінші күні фан-клуб мүшелері Кракус қорғанынан Краковтың Басты алаңына дейін жүріп өтіп, сүйікті әншісінің алдағы концерті туралы ақпараттық материалдар таратты.
Концерт қарсаңындағы ауқымды ақпараттық науқан Испанияда да басталды. Димаш мұнда 30 қазанда өнер көрсетеді. Науқан 16 маусымда басталған. Жергілікті фан-клуб мүшелерінің мақсаты — қазақстандық әншінің шығармашылығын кең аудиторияға таныстыру, сондай-ақ Димаштың Испаниядағы екінші жеке концерті туралы хабарлау. Бүгінде науқанға 150-ден астам дүкен мен өзге мекеме қосылды, олардың саны артып келеді.
Латын Америкасында да сүйікті әншісін күтуде. Әнші 24 қарашада Чилиде концерт береді. Концертке билеттер сатылып кеткен. Сантьягоның басты көшелерінің біріндегі үлкен цифрлық экранда Димашқа арналған арнайы құттықтау пайда болды. Бұл бастаманы Димаштың жанкүйерлерінің бірінің ұлы қолға алған. Анасының қазақстандық әншінің өнерін жақсы көретінін білетін жарнама саласында жұмыс істейтін жігіт цифрлық құттықтау ұйымдастыруды шешті. Хабарлама шыққан сәтте экран алдына чили фан-клубының өкілдері жиналып, асыға күткен оқиғаның жақындағанын атап өтті.
Осылайша, алдағы әлемдік тур Димаштың әр елдегі жанкүйерлерін біріктірді. Олардың барлығы әншімен кездесуді асыға күтіп, жерлестеріне ол туралы және Қазақстан туралы айтып жүр.