22-24 шілде аралығында Астанада XXXV Қазақстан чемпионаты өтеді. Оған еліміздің түкпір-түкпірінен 265-тен астам спортшы қатысады. Нәтижелер Азия ойындарына құрама команданы іріктеуге негіз болады. Бұл туралы infohub.kz сайты хабарлады.
Қазақстан Республикасы Туризм және спорт министрлігінің хабарлауынша, ұлттық біріншілік елдің үздік жеңіл атлеттері үшін маусымның басты старты болады. Ол Қазақстан құрамасының Азия ойындарына қатысатын құрамын анықтайды.
Негізгі жарыстар Қазақ ұлттық спорт университетінің жаңа стадионында өтеді. Лақтыру пәндері бойынша сайыстар Қазақстан жеңіл атлетика кешенінің арнайы секторында ұйымдастырылады.
Чемпионат медальдары үшін Қазақстанның 17 өңірінен 265-тен астам спортшы бақ сынасады. Сонымен қатар, конкурстан тыс бағдарлама бойынша үш рет секіруден Әзірбайжан өкілі Екатерина Сариева өнер көрсетеді.
Үш жарыс күні ішінде қатысушылар ерлер мен әйелдер арасындағы 48 жеке пән бойынша, сондай-ақ аралас эстафеталар 4×100 метр және 4×400 метр бойынша жүлделерді сарапқа салады.
Жарысқа Қазақстан ұлттық құрамасының жетекші өкілдері шығады, олардың қатарында Каролин Чепкоеч Кипкируи, Дэйзи Джепкемей, Кристина Овчинникова, Надежда Дубовицкая, Елизавета Матвеева, Анастасия Рыпакова, Мария Ефремова, Аделина Земс, Андрей Соколов, Эльнур Мухитдинов, Иван Иванов, Иван Товченник, Виктория Ан, Виталий Земс, Вячеслав Земс және басқа да еліміздің мықты спортшылары бар.
Чемпионат қорытындысы бойынша жаттықтырушылар штабы Азия ойындарына қатысу үшін ұлттық команданың соңғы құрамын жасақтайды. Бұл осы турнирді қазақстандық жеңіл атлеттер үшін маусымның ең маңызды старттарының біріне айналдырады.
XXXV Қазақстан Республикасы чемпионатының салтанатты ашылу рәсімі 22 шілде күні сағат 16:30-да өтеді. Жарыстар елдің үздік спортшыларын анықтау алаңы ғана емес, сонымен қатар ұлттық команданың халықаралық старттарға дайындығының маңызды кезеңі болады деп күтілуде.