Қазақстанның Денсаулық сақтау министрлігі азаматтарды емдеу басталмай тұрып шетелдік медициналық орталықтарды мұқият тексеруге шақырды. Ведомство қандай критерийлерге бірінші кезекте назар аудару керектігін айтып, тәуекелдерден сақтануға көмектесетін кеңестер берді, деп хабарлайды infohub.kz сайты.
Кез келген шетелдік медициналық орталыққа жүгінбес бұрын, ол туралы барлық қолжетімді ақпаратты зерделеу, аккредитациясының бар-жоғын тексеру, дәрігерлердің тәжірибесі мен ұсынылатын жағдайларға көз жеткізу қажет. Атап айтқанда, келесі критерийлерді басшылыққа алу ұсынылады: клиниканың халықаралық аккредитациясының болуы (JCI, ISO және т.б.); дәрігерлердің біліктілігі және қажетті ем түрлерін жүргізу тәжірибесі; диагностика мен терапияның дәлелді әдістерін қолдану; ем құны, кезеңдері және ықтимал нәтижелер туралы ақпараттың ашықтығы; медициналық ұйым қызметінің ресми расталуы.
«Азаматтарға толық сауығуды уәде ететін, тексерілмеген емдеу әдістерін ұсынатын немесе толық консультация мен медициналық құжаттарды талдаусыз шешім қабылдауды талап ететін ұсыныстарға сақтықпен қарау керек», – делінген хабарламада.
Денсаулық сақтау министрлігінде белгіленген сапа мен қауіпсіздік критерийлеріне сәйкес келетін шетелдік медициналық клиникалар тізімі қазақстандықтарды бюджет қаражаты есебінен шетелде емделуге жіберу кезінде қолданылатынын түсіндірді. Ведомство бұл ақпарат шетелде көмек алу үшін медициналық ұйымды өз бетінше таңдайтын пациенттерге пайдалы болуы мүмкін екенін атап өтті.
75 клиниканы қамтитын тізіммен сілтеме арқылы танысуға болады. Тізімде Ресей, Беларусь, Оңтүстік Корея, БАӘ, Германия, Үндістан, Түркия, Украина, Испания және Сербияда орналасқан медициналық орталықтар ұсынылған.
Бұған дейін «Курсив» жүректі шетелде емдеу 20 млн теңгеге дейін жетуі мүмкін екенін жазған болатын.