Қызылорда облысында Жосалы, Төретам және Арал теңізі станцияларындағы теміржол вокзалдарын қайта жаңарту жұмыстары аяқталды. Бұл туралы Қазақстан Республикасы Көлік министрлігі хабарлады. Облыстағы тағы екі станцияда жөндеу жұмыстары жалғасып жатыр, деп жазады infohub.kz сайты.
Үш вокзалда қасбеттер, шатыр, ішкі үй-жайлар мен инженерлік жүйелер жаңартылып, перрондар мен айналадағы аумақтар жөнделді. Ғимараттарға энергия үнемдейтін терезелер мен алюминий витраждар орнатылып, жабдықтар мен жиһаздар қойылды. Әрлеу үшін қазақстандық өндірістің материалдары пайдаланылды.
Жосалы вокзалының екі қабатты ғимараты 1905 жылы салынған. Оның ауданы 628,8 шаршы метрді құрайды. Станция арқылы Қазақстанның ірі қалаларымен қатар Ресей, Өзбекстан және Қырғызстанға қатынайтын 22 жолаушы пойызы өтеді.
Төретам станциясында ауданы 628,8 шаршы метр екі қабатты вокзал қайта жаңартылды. Оны күн сайын орта есеппен 340-тан астам жолаушы пайдаланады. Станция арқылы 22 жолаушы пойызы өтеді.
Арал теңізі вокзалының ғимараты 1904 жылы салынған. Қайта жаңартудан кейін оның ауданы 439,8 шаршы метрді құрайды. Тәуліктік орташа жолаушы ағыны 640 адамнан асады. Станция арқылы Аралды Қазақстан мен көрші елдердің қалаларымен байланыстыратын 24 жолаушы пойызы өтеді.
Қайта жаңарту президенттің тапсырмасы бойынша теміржол вокзалдарын жаңғырту бағдарламасы аясында жүргізілді. Қызылорда облысында Тереңөзек және Жалағаш станцияларында жұмыстар жалғасып жатыр.
Бұған дейін «Курсив» Қостанайда қайта жаңартудан кейін бір мезгілде 2 мың адамға дейін қабылдай алатын теміржол вокзалы ашылғанын жазған болатын. Ғимаратта лифтілер, эскалатор, балалар ойын бөлмесі және тәулік бойы жұмыс істейтін кафе пайда болды.