Қазақстанда бағаны реттеу тізімінен 1,2 мыңнан астам дәрі-дәрмек атауы алынып тасталды. Бұл — құны бір айлық есептік көрсеткіштен (АЕК) төмен арзан рецептілік препараттар. Фармацевтикалық қызметті қолдау және дамыту қауымдастығының президенті Марина Дурманованың пікірінше, бәсекелестіктің күшеюі осы дәрілердің бағасын төмендетуі мүмкін, деп хабарлайды infohub.kz сайты.
Оның айтуынша, бағаны реттеуге жататын тізімдегі атаулар саны 3 039-нан 1 827-ге дейін қысқарған. Реттеуден шығарудың қазіргі кезеңі құны 1 АЕК-тен (2026 жылы 4 325 теңге) төмен рецептілік препараттарды қамтиды.
«Неге 1 АЕК-тен төмен баға сонша маңызды? Себебі бұл — арзан сегмент. Дәл осы препараттар одан әрі арзандауы мүмкін. Өйткені нарық — бұл бәсеке. Яғни, егер бұл препараттар бағаны реттеуден шығарылса, бәсеке бағаны төмендетуге көмектеседі», — деп түсіндіреді ол.
Дурманованың айтуынша, бұл сондай-ақ осы дәрі-дәрмектердің жеткізілім көлемінің ұлғаюына әкеледі.
«Бұл дегеніміз, мұндай дәрілер қазақстандық нарыққа кең ассортиментте кіреді. Тиісінше, бұл фармацевтикалық өнеркәсіптің және жалпы фармсаланың дамуына да көмектеседі. Сондықтан біз дәрі-дәрмектер арзандауы мүмкін деп айтып отырмыз», — деп атап өтті ол.
Дурманова дәрі-дәрмек бағасын кезең-кезеңімен реттеуден шығару бағыты Қазақстан президентінің 2022 жылғы Жолдауында белгіленгенін еске салды. Одан кейін «Халық денсаулығы және денсаулық сақтау жүйесі туралы» кодекске дәрі-дәрмек бағасын реттеуден шығару бөлігінде өзгерістер енгізіліп, денсаулық сақтау саласындағы бәсекелестікті дамытудың жол картасы әзірленді.
«Курсив» бұған дейін Денсаулық сақтау министрлігі құны 4 325 теңгеден төмен препараттарды мемлекеттік бақылаудан шығарып жатқанын жазған.