Қазақстан мобильді интернет жылдамдығы бойынша әлемдік рейтингте позициясынан айырылуда: 2026 жылдың алғашқы бес айында ел 50-орыннан 56-орынға түсіп, медиандық жылдамдық 12,1%-ға төмендеген, ал әлемде бұл көрсеткіш 4%-ға өскен. Бұл туралы infohub.kz сайты хабарлайды.
Energyprom.kz сарапшыларының мәліметінше, 2026 жылғы мамырда Қазақстандағы мобильді интернеттің медиандық жылдамдығы 88,11 Мбит/с құрады, бұл әлемдік орташа көрсеткіштен (113,16 Мбит/с) шамамен 25 Мбит/с-қа төмен. Қаңтарда бұл көрсеткіш 100,2 Мбит/с болса, мамырда 12,1%-ға төмендеген. Сол кезеңде әлемдік орташа жылдамдық керісінше 4%-ға өсті.
Нәтижесінде Қазақстан жаһандық рейтингте біртіндеп позициясынан айырылуда. Қаңтарда республика 50-орында болса, ақпанда 49-орынға көтерілген, алайда одан кейін төмендеу басталды: наурызда 51-орын, сәуірде 52-орын, мамырда 56-орын. Осылайша, бір айда төрт, ал жыл басынан бері алты позицияға жоғалтты.
Дегенмен Қазақстан Орталық Азияда әлі де көшбасшы. Өзбекстан 77-орында (61,03 Мбит/с), Қырғызстан 82-орында (51,56 Мбит/с). Алайда сарапшылар Қазақстанның артықшылығы тез азайып жатқанын атап өтеді: қаңтарда Өзбекстанмен жылдамдық айырмасы 47 Мбит/с-тан асса, мамырда 27 Мбит/с-қа дейін қысқарды.
Ірі қалаларда да жағдай мәз емес. Алматыда мобильді интернет жылдамдығы қаңтардан бері 22%-ға төмендеп, қала әлемдік рейтингте 60-орыннан 84-орынға түсті. Астанада 17,4%-ға төмендеп, елорда 17 позицияға жоғалтып, 79-орынды иеленді. Алайда екі қала да әлі де әлемдік орташа көрсеткіштен жоғары: мамырда Астанада 120,7 Мбит/с, Алматыда 115,55 Мбит/с.
Сарапшылар көрсеткіштердің нашарлауын елдің аумағының үлкендігімен ғана түсіндіру қиын екенін айтады. Мысалы, ауданы бойынша Қазақстаннан үлкен Бразилия мобильді интернет жылдамдығы бойынша әлемдік бестікке кіреді, ал оның екі қаласы жаһандық рейтингтің алғашқы ондығында.
Зерттеу авторларының пікірінше, басты мәселе – Қазақстанның рейтингтегі ағымдағы орны емес, теріс динамика. Басқа елдер мобильді интернетті жылдамдатып жатқанда, Қазақстан әлемдік деңгейден қалып, уақыт өте келе Орталық Азияда да көшбасшылығын жоғалту қаупі бар. Жылдамдықтың төмендеу себептері – желілердің шамадан тыс жүктелуі, базалық станциялардың жетіспеушілігі, операторлардың инвестициясының аздығы немесе трафиктің өсуі – зерттеуде ашылмаған.