Көлік министрлігі Қазақстанның бес теміржол бағытында жолаушылар интернетке қосыла алатынын мәлімдеді, деп хабарлайды infohub.kz сайты.
Қазіргі таңда келесі бағыттардағы жолаушылар пойыздары интернетпен қамтамасыз етілген: Қызылорда – Павлодар, Жезқазған – Астана, Астана – Семей, Алматы – Достық, Қызылорда – Көкшетау.
«Спутниктік байланысты пайдалану теміржолдың ұялы операторлар қамтылмаған учаскелерінде де интернетке тұрақты қосылуды қамтамасыз етеді. Бұл жолаушыларға маршруттың барлық бойында мессенджерлер, әлеуметтік желілер, жұмыс сервистері және басқа онлайн-платформаларды пайдалануға мүмкіндік береді», – деді Көлік министрлігінде.
Ведомствода түсіндіргендей, қызметке қосылу үшін жолаушылар пойыздағы Wi-Fi желісін таңдап, авторизациядан өтуі тиіс. Одан кейін WhatsApp және Telegram-да мәтіндік хабарламалар алмасу үшін тегін қосылуды пайдалануға немесе интернет-ресурстарға, әлеуметтік желілерге, бейнеқызметтер мен жұмыс қосымшаларына толық қолжетімділікті қамтамасыз ететін ақылы тарифті ресімдеуге болады.
Ведомство жолаушылар пойыздарын интернетпен қамтамасыз етуді басым бағыттардың бірі ретінде атап өтті.