Қазақстан Президенті Қасым-Жомарт Тоқаевтың бастамасымен Халықаралық еріктілер жылы аясында Нью-Йорктегі БҰҰ штаб-пәтерінде волонтерлік саласындағы халықаралық ынтымақтастықты дамытуға арналған бірқатар іс-шара өтті, деп хабарлайды infohub.kz сайты.
Бастаманы Қазақстан көтерді. Оны Әзербайжанның Өзара Іс-Қимыл және Сенім Шаралары Кеңесіндегі (ӨСК) төрағалығы, ӨСК хатшылығы және БҰҰ Еріктілер бағдарламасы қолдады.
Бағдарлама аясында «ӨСК-ге мүше мемлекеттердегі волонтерлік» атты фотовыставка ашылды және «ӨСК-ге мүше мемлекеттердегі волонтерліктің үздік тәжірибелері» тақырыбында халықаралық панельдік пікірталас өтті. Қатысушыларға ӨСК елдеріндегі еріктілікті дамытудың озық тәжірибесі туралы электронды басылым да таныстырылды.
Пікірталаста Қазақстанның тәжірибесіне ерекше назар аударылды. БҰҰ өкілдері еріктілік қызметін есепке алудың ұлттық жүйесін және ел ішінде де, халықаралық деңгейде де волонтерлікті ілгерілету жөніндегі тұрақты мемлекеттік саясатты жоғары бағалады.
Талқылауға БҰҰ, ӨСК-ге мүше мемлекеттердің өкілдері мен халықаралық сарапшылар қатысты. Олар волонтерлік, жастардың қатысуы және халықаралық ынтымақтастық саласындағы табысты тәжірибелермен бөлісті.
Іс-шаралардың БҰҰ штаб-пәтерінде өтуі Қазақстанның жаһандық еріктілік күн тәртібін ілгерілетуге және тұрақты даму мүддесіндегі ынтымақтастықты нығайтуға қосқан үлесінің мойындалғанын растады.