«Жынды Макс» культтік франшизасының авторы, аты аңызға айналған режиссер Джордж Миллер алғаш рет Қазақстанға арнап ресми бейнеүндеу жазды. Ол Конаевта өтетін Drive Forum Great Orda авто- және мототуризм фестивалінің ұйымдастырушылары мен қонақтарына жүгінді, деп хабарлайды infohub.kz сайты.
«Оскар» иегері өз үндеуінде «Жынды Макс» әлемі фестивальді ұйымдастырушыларды шабыттандырғанына қуанышты екенін айтты. «Жынды Макс туралы оқиғаның шынайы рухы – тек көліктер мен шөл дала жолдары ғана емес, сонымен қатар еркіндік, батылдық және кез келген қиындыққа қарамастан алға ұмтылу. Әрқайсыңызға жаңа достар, керемет шытырман оқиғалар – ұмытылмас, барлық жағынан шабыттандыратын сәттер тілеймін. Жолда кездескенше!» – деді Миллер.
Drive Forum Great Orda фестивалі 24-26 шілде аралығында Конаевтағы Қапшағай су қоймасының жағасында өтеді. Ұйымдастырушылар «Жынды Макс» әлемін еске түсіретін апаттан кейінгі әлем атмосферасын уәде етеді. Фестивальға 1,5 мыңнан астам қатысушы жиналады деп күтілуде. Қазақстан, Ресей, Өзбекстан, Қырғызстан және басқа елдерден саяхатшылар мен автотуризм әуесқойлары келеді. Шетелдік қонақтар арасында Кипрден ұйымдасқан топ та болады. Жобаның серіктесі – халықаралық MadWay Rally командасы.
«Фестиваль ежелгі көшпенділер мәдениеті мен Еуразия дала кеңістігінің дәстүрлерін заманауи трендтермен ұштастырады. Жоба экспедициялық туризмге серпін беріп, Конаев қаласын көпфункционалды курорттық және event-кластер ретінде дамытуға бағытталған. Болашақта Drive Forum GREAT ORDA ірі тақырыптық фестивальдар, автоспорт және тарихи реконструкция әуесқойлары үшін басты Орталық Азиялық хабқа айналып, әлемдегі ірі аналогтармен бәсекелесе алады», – деп түйіндеді Қазақстан туризмі.
Бұған дейін Қазақстанда жағажай маусымы қызған тұста алматылықтар Қапшағайға жетудің жылдам әрі арзан жолдарын іздеп жүргені хабарланған болатын. Конаев пен оның жағажайларына барудың ең арзан әрі дәлелденген тәсілі – пойыз екен.