Ирландияда үрлемелі батутта өткен жеке балалар кеші антибиотикке төзімді бактерияның жаппай таралуына әкелді: дәрігерлер балалар мен жасөспірімдер арасында 22 расталған және 26 ықтимал жұқпа жағдайын тіркеді, деп хабарлайды infohub.kz сайты.
Gizmodo порталының мәліметінше, алтын түсті стафилококк індеті елдің шығыс бөлігінде орын алған. Төрт бала ауруханаға жатқызылды, алайда өлім жағдайы болмады. Барлық науқас балалар бактерия таралуының негізгі көзі болған аттракционда бірнеше сағат өткізген.
Eurosurveillance журналындағы зерттеушілер бұл ел тарихындағы ең үлкен ауруханадан тыс MRSA індеті екенін атап өтті. Жұқпа терідегі бөртпелермен, күлдіреуіктермен, сондай-ақ жоғары температурамен және жүрек айнумен қатар жүрді. Суперинфекцияның таралуына ылғалды жылы ауа райы және балалардың аттракционның шектеулі кеңістігінде ұзақ уақыт физикалық байланыста болуы ықпал етті.
Денсаулық сақтау қызметі байланыстарды бақылау және науқастарды уақытша оқшаулау арқылы індетті жергілікті жерде тоқтатты. Аттракцион жалдау компаниялары жабдықты толық санитарлық өңдеуден өткізу туралы нұсқама алды. Мамандар суперинфекциялар ауруханалардан жиі шығып, балалар іс-шараларында жоғары дезинфекция қажет ететінін ескертеді.