Халықаралық фонограмма өндірушілер федерациясы (IFPI) ірі музыкалық дистрибьюторлармен бірлесіп, авторларды, құқық иелерін және тыңдармандарды тыңдалымды бұрмалаудан қорғауға бағытталған Streaming Integrity Initiative бастамасын іске қосты, деп хабарлайды infohub.kz сайты.
Engadget басылымының жазуынша, жасанды интеллект пен автоматтандырылған жүйелер арқылы стримдерді қолдан көбейту нақты орындаушылардың табысын алаяқ манипуляторларға ағызып жібереді.
Жаңа жоба аясында қатысушылар бес негізгі қағидатты ұстануға міндеттенді. Дистрибьюторлар пайдаланушылардың жеке басын және контентке құқығын тексеретін қатаң рәсімдерді енгізіп, жасанды интеллектке байланысты тәуекелдерді анықтайтын заманауи құралдарды қолданады.
Сонымен қатар келісімге қол қойған компаниялар алаяқтар туралы деректермен бөлісіп, қорғаныс жүйелерін үнемі жаңартып отырмақ.
Бастамаға Sony Music Group, Universal Music Group және Merlin ұйымы сияқты салалық алыптар қосылды. IFPI өкілдері музыка нарығындағы қалған ойыншыларды да құжатқа қол қоюға шақырып, өзгеріп отыратын киберқауіптерге қарсы біртұтас майдан құруға үндеді.