Алматы облысы Қарасай ауданындағы Қасқыр тауында екі жасөспірім жаяу жүру кезінде бағыттан адасып кеткен, деп хабарлайды infohub.kz сайты.
ТЖМ мәліметінше, құтқарушылар тауда адасқан жасөспірімдерді тапты. Түнде Қасқыр тауында екі жасөспірімнің жаяу жүру кезінде бағыттан адасқаны анықталды. «Байланыс үзілгенге дейін олар өз бетінше жол таба алмайтынын айтып, көмек сұрап үлгерген. Телефоны толығымен дерлік зарядсызданғандықтан соңғы байланыс үзілген», — деді ведомствода.
Іздеуге ҚР ТЖМ «Барыс» республикалық құтқару қызметінің құтқарушылары дереу шықты. Іздеу-құтқару операциясы барысында жасөспірімдер Қасқыр тауының беткейінен табылды. Бақытымызға орай, оларға медициналық көмек қажет болмады.
Құтқарушылар жасөспірімдерді қауіпсіз маршрутпен Проходное шатқалына дейін алып барып, содан кейін ата-аналарымен кездесу орнына жеткізді.