Астанадағы Ұлттық ғылыми медициналық орталығының (UMC) дәрігерлері 60 жастағы ер адамға жүрек трансплантациясын сәтті жасады. Марқұмның отбасы келісім бергеннен кейін донорлық мүше бірнеше сағат ішінде жеткізіліп, отырғызылды, деп хабарлайды infohub.kz.
Денсаулық сақтау министрлігінің нақтылауынша, 14 шілдеден 15 шілдеге қараған түні Көпбейінді медициналық орталықта әлеуетті донор анықталды. Туыстары келісім бергеннен кейін донорлық процесс толық ұйымдастырылды. Реципиент – 1966 жылы туған ер адам, ұзақ уақыт күту тізімінде болған. Дәрігерлер оның жағдайы отадан кейінгі кезеңге сәйкес келетінін айтады.
Министрлік донордың отбасына қабылданған шешім үшін, трансплантацияны жүргізген барлық дәрігерлерге, сондай-ақ жүректі елордаға жедел жеткізген санитарлық авиация қызметкерлеріне алғыс білдірді.
Ведомствоның мәліметінше, Қазақстанда өмірлік маңызы бар мүшелерді трансплантациялауды 4,7 мыңнан астам адам, оның ішінде 125 бала күтіп отыр. Олардың ішінде бүйрек трансплантациясы 4 208 науқасқа, бауыр – 293, жүрек – 208, өкпе – 30, өкпе-жүрек кешені – 5 адамға қажет. «Әрбір қайтыс болғаннан кейінгі донорлыққа келісім – трансплантация жалғыз емдеу тәсілі болып отырған адамдардың өмірін сақтау мүмкіндігі», – деп атап өтті министрлікте.
Бұған дейін Алматыдағы Кардиология және ішкі аурулар ғылыми-зерттеу институтында ауыр митральды регургитациясы бар науқастарға TEER технологиясы бойынша бірқатар аз инвазивті оталар жасалғаны хабарланған болатын. Араласулар кеуде қуысын ашпай және жасанды қан айналымынсыз жұмыс істеп тұрған жүректе жүргізілген.