Астана полициясы әлеуметтік желілерде бейнежазба анықтады. Онда ер адам футбол матчы кезінде алдындағы орындықтың арқалығына аяғын қойып, қоғамдық тәртіпті бұзған. Бұл туралы infohub.kz сайты хабарлайды.
Құқық бұзушы елорданың 28 жастағы тұрғыны болып шықты. Анықталғандай, матч кезінде ол аяқ киімін шешіп, аяғын алдындағы орындықтың арқалығына қойып, айналасындағыларға құрметсіздік көрсеткен. Бұл басқа көрермендердің наразылығын тудырған.
Ұсақ бұзақылық, яғни қоғамдық тәртіпті бұзу және айналасындағыларға құрметсіздік көрсету үшін құқық бұзушы әкімшілік жауапкершілікке тартылды. Сот шешімімен оған 20 АЕК (86 500 теңге) мөлшерінде айыппұл салынды.
Полиция айналасындағыларға құрметпен қарау, мінез-құлық ережелерін сақтау және қарапайым әдептілік қоғамдық тәртіптің негізі екенін еске салды.
Сондай-ақ полицейлер азаматтарды қоғамдық тәртіп нормаларын сақтауға, айналасындағылардың құқығы мен жайлылығын құрметтеуге, спорттық және басқа да бұқаралық іс-шараларда тәртіпті қолдауға шақырды. Әркімнің мәдениеті — барлығына қауіпсіз әрі жайлы атмосфераның кепілі.