Астаналық азамат футбол матчынан кейін арнайы жасақ қызметкерлерін қатты ұрып-соқты деп айыптады. Осыған байланысты елорда полициясы қызметтік тексеру бастады, деп хабарлайды infohub.kz.
Ер адам өз оқиғасын Threads әлеуметтік желісінде жариялады. Оқиға 12 шілдеде «Астана Арена» стадионы маңында Премьер-лиганың «Астана» мен «Ақтөбе» командалары арасындағы матчтан кейін болған. Оның айтуынша, оны және ағасын арнайы жасақтың тоғыз қызметкері ұрып-соққан. Олар қол-аяқпен, берц киген аяқпен бастан ұрған. Бұл көрініс зардап шеккен адамның қарындастарының көз алдында болған. Содан кейін ер адамдарды көлікке итеріп, жарты сағат ұстап, шабуылдаушылардың бет-әлпеті түсірілген бейнежазбаны жоюға мәжбүрлеген.
«Бізді қол-аяқпен, берц киген аяқпен бастан аяусыз әрі үздіксіз ұрды. Кейін көлікте жарты сағат ұстап, олардың беттері көрінген видеоны күшпен жойғызды», — деп жазды ол.
Зардап шеккен адам ауруханаға жүгінді, онда дәрігерлер ауыр соққыларды, жабық бас-ми жарақатын және ми шайқалуын тіркеді. «Дәрігерлер ауыр соққыларды тіркеп, оған қоса жабық бас-ми жарақаты мен ми шайқалуы туралы қорытынды берді. Кейін полиция департаментінің қауіпсіздік қызметінің қызметкері қылмыстық іс қозғаудан бас тартқан соң, біз өз еркімізбен ақылы негізде сот-медициналық сараптама жасаттық», — делінген жарияланымда. Ер адам куәгерлерді хабарласуға шақырды.
Астана полициясы матч кезінде жанкүйерлер тобының агрессивті әрекет еткенін растады: олар былапыт сөйлеп, қарсы команданың жанкүйерлерін арандатып, әдепсіз ым-ишара көрсеткен. Қатысушылардың бірі аяғына қарсы команданың футбол клубының жалауын байлаған. Полиция қызметкерлері жанжалдың алдын алу үшін араласқан. Оқиғаға қатысушыларды оқшаулап, қызметтік автобусқа апарып, кейін босатқан.
«Сонымен бірге осы факті бойынша қызметтік тексеру тағайындалды. Оның нәтижелері бойынша оқиғаға қатысушылардың барлық әрекетіне қолданыстағы заңнамаға сәйкес құқықтық баға беріледі», — деп қосты ведомство.