Алматы орталығында Қала күніне арналған мерекелік шараларға байланысты көлік қозғалысына уақытша шектеу енгізіледі. Бірнеше көшеде қозғалыс өзгереді, бұл туралы мегаполис әкімдігі хабарлады, деп жазады infohub.kz сайты.
Төле би және Қазыбек би көшелерінің Абылай хан даңғылынан Назарбаев даңғылына дейінгі бөліктері 17 қыркүйекте сағат 15:00-ден 21 қыркүйектегі 03:00-ге дейін жабылады.
Сонымен қатар, Төле би көшесінің Назарбаев даңғылынан Абылай хан даңғылына дейінгі бөлігі 17 қыркүйекте сағат 22:00-ден 21 қыркүйектегі 24:00-ге дейін толығымен жабылады.
Осы кезеңде он автобус бағытының қозғалыс схемалары уақытша өзгереді: №16, 37, 48, 126, 201, 205, 206, 209, 210 және 224.
«№37, 48, 201, 206, 209, 210 және 224 бағыттары шығыс бағытта Абылай хан даңғылы, Қабанбай батыр көшесі және Назарбаев даңғылы арқылы, батыс бағытта Назарбаев даңғылы, Бөгенбай батыр көшесі және Абылай хан даңғылы арқылы жүреді. №16, 126 және 205 бағыттары да уақытша өзгеріп, жабылған бөлікті Гоголь, Қалдаяқов, Желтоқсан, Наурызбай батыр көшелері және оған жалғас магистральдар арқылы айналып өтеді», — делінген хабарламада.
Қала тұрғындары мен қонақтарынан уақытша шектеулерді ескеріп, сапар бағыттарын алдын ала жоспарлауды сұрайды.