Лондонда өткен World Airline Awards 2026 салтанатында Air Astana әуекомпаниясы екі аймақтық марапатқа ие болды. Қазақстандық тасымалдаушы он бесінші рет қатарынан Орталық Азия мен ТМД-ның үздік әуекомпаниясы деп танылды, сондай-ақ ондыншы рет аймақтағы үздік ұшу кезіндегі қызмет көрсету жүлдесіне лайық деп табылды, деп хабарлайды infohub.kz сайты.
Салтанат жұма күні, 18 қыркүйекте, атақты лондондық The Langham қонақүйінде өтті. Марапаттарды жыл сайын әлемнің түкпір-түкпірінен жолаушылар арасында сауалнама жүргізіп, саланың үздік компанияларын анықтайтын Skytrax халықаралық рейтингтік агенттігінің өкілдері табыс етті. Айта кетейік, Air Astana қызмет көрсету сапасы мен сервисі бойынша аймақтағы мойындалған көшбасшы болып қала береді, мұны World Airline Awards жүлдесі мен жолаушылардың жоғары бағасы тағы да растады.
Алайда биыл Air Astana тобының тағы бір әуекомпаниясы — FlyArystan да лауреаттар қатарынан табылды. Лоукостер төртінші жыл қатарынан «Орталық Азия мен ТМД-ның үздік бюджеттік әуекомпаниясы» мәртебесіне ие болды.
Air Astana тобының бас атқарушы директоры Ибрахим Жанлыел айтуынша, Air Astana мен FlyArystan үшін осы беделді Skytrax марапаттарын алу үлкен құрмет.
«Бұл мойындау ерекше құнды, өйткені ол жолаушыларымыздың пікірін білдіріп, екі әуекомпанияның да өз сегменттеріндегі мықты ұстанымын көрсетеді. Тұтынушыларымызға сенім мен адалдықтары үшін, ал бүкіл ұжымға іске берілгендігі мен қауіпсіздік пен сервистің жоғары стандарттарына ұмтылысы үшін алғыс айтқым келеді», — деді Жанлыел.
Air Astana басшысы топ өзінің өсу кезеңінің келесі сатысына қадам басып отырғанын, соның арқасында қызметкерлер санына, әуе паркіне және клиенттік тәжірибеге инвестицияларды жалғастыру жоспарланып отырғанын қосты.
Әуекомпанияның жетістігін Skytrax бас директоры Эдвард Плейстед те атап өтті. Оның айтуынша, беделді жүлдені алу Air Astana қызметі мен өнімінің ең жоғары стандарттарын көрсетеді.
«Жолаушылар ұсынылып отырған сервисті жоғары бағалайды, ал 2026 жылдың қорытындысы Air Astana-ның ұшу барысындағы үздік сапаны қамтамасыз етуге және жоғары стандарттардың тұрақтылығына ұмтылысын көрсетеді», — деді Плейстед.
Сонымен қатар компания өз қызметін кеңейтіп, бір мезгілде қызмет көрсету сапасына назар аударуды жалғастырып отыр. Кезекті марапаттар таңдалған даму бағытының тағы бір дәлелі болды.
Айта кетейік, World Airline Awards әуециялық жүлдесін Skytrax 1999 жылы тағайындаған. Компанияларды бағалау үшін 100-ден астам елдің жолаушылары арасында халықаралық сауалнама жүргізіледі. Тұтынушылар 350-ден астам әуекомпанияны ұшу барысындағы жайлылық, тіркелу, отырғызу және тағы басқа көптеген нюанстарды қоса алғанда, түрлі санаттар бойынша бағалайды. Зерттеу мен салтанатты Skytrax қаржыландырады, ал әуекомпанияларға қандай да бір шығынды төлеуге тура келмейді, бұл жүлденің объективтілігін көрсетеді.
Еске салайық, бұған дейін Air Astana APEX нұсқасы бойынша «Орталық Азияның үздік әуекомпаниясы» атағын, Pax International Readership Awards, Onboard Hospitality Awards марапаттарын да алған болатын.