29 сәуір — бірнеше халықаралық мереке мен тарихи оқиғалар тоғысқан күн. Халықаралық би күні, Иммунология күні және Химиялық қару қолдану құрбандарын еске алу күні атап өтіледі. Ал Қазақстанда жылдар бойы осы күні елеулі оқиғалар болған, деп хабарлайды infohub.kz.
Халықаралық би күні ЮНЕСКО-ның Халықаралық би кеңесінің бастамасымен 1982 жылы белгіленді. Күн француз балетмейстері, теоретик және реформатор Жан-Жорж Новердің (1727–1810) туған күніне орай таңдалды. Оны «заманауи балеттің әкесі» деп атайды. Ұсынысты педагог әрі хореограф Петр Гусев енгізді.
Халықаралық иммунология күні Халықаралық иммунологиялық қоғамдар одағы (IUIS) мен Еуропалық иммунологиялық қоғамдар федерациясының (EFIS) бастамасымен аталып өтеді. Алғаш рет 2005 жылы еуропалық деңгейде аталып, 2007 жылдан бастап халықаралық мәртебе алды. Бұл күннің басты мақсаты — иммунологияның инфекциялар, аутоиммунды аурулар және қатерлі ісікпен күрестегі маңыздылығын көрсету, сондай-ақ әр ел мамандарын тәжірибе алмасуға біріктіру.
Химиялық қару қолдану құрбандарын еске алу күні 2005 жылы қарашада бекітілген. Бұл күн 1997 жылы 29 сәуірде Химиялық қаруды әзірлеуге, өндіруге, жинақтауға және қолдануға тыйым салу мен оны жою туралы конвенцияның күшіне енуіне байланысты.
1911 жылы британдық кәсіпкерлер игерген Доссор мұнай кен орнынан қуатты мұнай фонтаны атқылады. Ұңғыма 30 сағат бойы атқылап, 16 700 пұт мұнай берді.
1936 жылы «Вечерний Алматы» (бұрынғы атаулары — «Социалистическая Алма-Ата», «Вечерняя Алма-Ата») газетінің тұңғыш саны жарық көрді. Басылым экономика, қала шаруашылығы, мәдениет, медицина, білім мен тәрбие мәселелерін қамтып, сондай-ақ спорт, сөзжұмбақ, жұлдызнамә, әзілдер сияқты танымдық-ойын-сауық тақырыптарына да көңіл бөлді.
1940 жылы Қазақ мемлекеттік академиялық драма театрында Ғабит Мүсіреповтің «Қозы Көрпеш — Баян сұлу» пьесасының премьерасы өтті.
1992 жылы Алматыға Түркия Республикасының премьер-министрі Сүлеймен Демирель ресми сапармен келді. Салтанатты жағдайда Қазақстандағы Түркия елшілігінің ашылуы болды.
2002 жылы Қазақстан Республикасы Президентінің жанынан Ұлттық кеңес құрылды. Оның мақсаттары — мемлекеттік өмірдің маңызды мәселелері бойынша ұсыныстар әзірлеу, мемлекеттік органдардың халық алдындағы жауапкершілігін арттыру, азаматтық қоғаммен кең талқылау арқылы ішкі және сыртқы саясаттың негізгі бағыттарын айқындау.
2006 жылы Алматыда Қазақстанның музыка мәдениетінің көрнекті қайраткері, композитор, қазақ халық музыкасы туралы кітаптардың авторы, академик Ахмет Жұбановтың мемориалдық музейі ашылды.
2011 жылы режиссер Ардақ Әмірқұловтың Шыңғыс Айтматовтың повесі бойынша түсірілген «Қош бол, Гүлсары!» фильмі курорттық Киш аралында өткен бірінші Халықаралық иран кинофестивалінің арнайы жюри сыйлығын алды.
Сол жылы Алматыда КСРО халық әртісі, Халық Қаһарманы, М. Әуезов атындағы Қазақ академиялық драма театрының режиссері Әзербайжан Мамбетовке (1932–2009) мемориалдық тақта орнатылды. Тақта мәдениет қайраткері тұрған үйге қойылды.
2013 жылы «Үйлесім сабақтары» фильмі Нью-Йорктегі «Трайбека» фестивалінде үздік режиссерлік дебют үшін арнайы диплом алды. Бұған дейін бұл фильм «Берлинале-2013» басты байқауына қатысқан тұңғыш қазақстандық фильм болып, Азиз Жамбакиевтің операторлық жұмысы үшін «Күміс аю» сыйлығын, Morgen Post газетінің жүлдесін және сыншылардың оң пікірлерін алған болатын.
2017 жылы Қазақстанда сыбайлас жемқорлыққа қарсы іс-қимыл туралы алғашқы ұлттық баяндама жарияланды. Құжатқа қабылданған заңнамалық шараларға шолу, проблемаларды талдау және оларды шешу жөніндегі ұсыныстар енгізілген.
Сол жылы Пекиндегі Цинхуа университетінде Азия университеттері альянсының (АУА) құрылтай саммиті өтіп, оған Назарбаев Университеті қосылды. Альянсқа Тайланд, Гонконг, ҚХР, Үндістан, Сауд Арабиясы, Сингапур, Оңтүстік Корея, БАӘ, Индонезия, Малайзия және Жапониядан 15 жоғары оқу орны мүше болды.
2018 жылы Италияның Пезаро қаласында Дж. Россини атындағы XV Халықаралық музыка байқауында «Forte trio» мемлекеттік триосы мен «Астана сазы» фольклорлық ансамблі («Қазақконцерт») «Халық орындауы» номинациясында бірінші орынды иеленді. Италиялық көрермен А. Орманбек, Н. Якияев және А. Омаровтың кобыз бен домбырада орындауындағы Құрманғазы, Кетбұға, Ықылас, Д. Нұрпейісова және С. Тұрысбектің күйлерін тыңдады. Музыканттар Дж. Россини атындағы арнайы сыйлыққа ие болды.
2019 жылы Астанада Ұлттық қорғаныс университетінің базасында ТМД елдерінің әскери оқу орындары қауымдастығының алғашқы отырысы өтті. Қауымдастық Қазақстанның бастамасымен әскери білім саласындағы ынтымақтастықты дамыту, ғылыми-педагогикалық кадрларды даярлауды үйлестіру, оларды қайта даярлау және біліктілігін арттыру үшін құрылды.
2021 жылы Самарқандта Қазақстанның Бас консулдығының ресми ашылуы болды. Самарқанд облысының әкімі Э. Тұрдымов бұл оқиғаны тарихи маңызды деп атап, екі ел арасындағы стратегиялық әріптестікті кеңейту бағытына сай келетінін айтты.
2022 жылы Тбилисиде ұлы қазақ ақыны және ойшылы Абайға ескерткіш ашылды. Салтанатты шара Қазақстан мен Грузия арасындағы дипломатиялық қатынастардың 30 жылдығына орай ұйымдастырылды. Грузиядағы Қазақстанның Құрметті консулы Георгий Джахуташвилиге «Қазақстан Республикасының тәуелсіздігіне 30 жыл» мерейтойлық медалі, ал ескерткіштің авторы, грузин мүсінші Джумбер Джикияға ҚР елшілігінің алғыс хаты табыс етілді.
Сол жылы Пекинде Ахмет Байтұрсынұлының 150 жылдығы мен Роза Бағланованың 100 жылдығына арналған естелік конверттер шығарылды. Бір конвертте ағартушы және қоғам қайраткері Ахмет Байтұрсынұлы, екіншісінде аңыз әнші Роза Бағланова бейнеленген.